Deputeti i Kuvendit të Kosovës, Sllobodan Petroviq është ndalur dje në Merdarë nga xhandarmëria serbe, e cila ia ndaloi hyrjen në Serbi. Rreth ndalimit të Petroviq ka reaguar edhe Qeveria e Kosovës.

Qeveria e Republikës së Kosovës me shqetësim ka pranuar sot informatën se në vendkalimin kufitar në Merdare, është ndaluar pa asnjë arsye nga policia serbe, deputeti i Republikës së Kosovës, z. Slobodan Petroviq, dhe se i njëjti është mbajtur për orë të tëra në këtë vendkalim.

“Qeveria e Republikës së Kosovës deklaron se kjo nuk është hera e parë që qytetarët e Republikës së Kosovës, posaçërisht ata të komunitetit serb, që punojnë nëpër institucionet e Kosovës e që janë subjekt i hetimeve, keqtrajtimeve dhe fyerjeve nga autoritetet serbe” thuhet në reagimin e qeverisë.

Me tej ne reagim thuhet se: “Qeveria e Republikës së Kosovës e quan të pa tolerueshëm rastin e sotëm dhe kërkon që këto praktika nga ana e Serbisë të ndërpriten sa më shpejtë dhe që në të ardhmen asnjë qytetarë i Kosovës, nga asnjë përkatësi etnike të mos ketë problem të tilla”.

“Serbia duhet ta kuptojë njëherë e mirë se situata të tilla nuk i kontribuojnë fqinjësisë së mirë”, përfundon reagimi i qeverisë së Republikës së Kosovës.